Sipas të dhënave nga INSTAT, vitet e fundit, ritmet e rënies së popullsisë së Shqipërisë kanë nisur të përshpejtohen.
Por vihet re se ritmet e rënies së numrit të meshkujve janë më të shpejtë se te femrat.
Sipas të dhënave me 1 janar 2023, në të gjithë vendin zyrtarisht ishin 71,6 mijë meshkuj më pak se në vitin 2018 me rënie 5%.
Në të njëjtën periudhe kishim 36,8 mijë femra më pak, me rënie 2.6%.
Gjithnjë sipas statistikave, Shqipëria ka raport gjinor në lindje që favorizon meshkujt.
Mesatarisht në një vit lindin 105 djem për 100 vajza.
Por emigracioni më i lartë te meshkujt dhe jetëgjatësia më ulët se e femrave, po i pakëson burrat referojnë të dhënat.
INSTAT raporton se në vitin 2022 migrimi brenda Shqipërisë ka një ndikim të rëndësishëm në popullsinë e njësive administrative.
Sipas të dhënave , më 1 janar të vitit 2023, popullsia e përgjithshme e vendit pësoi rënie me 1.1% në raport me vitin 2022, ndërsa popullsia në moshë pune pësoi rënie me 1.8%.
Aktualisht popullsia në moshë pune është 1,864,062 persona nga 1,974,207 në vitin 2019, ose 101 mijë më pak.