Vapa-t përmbajnë nivele të larta plumbi, nikel dhe kromi. Cigaret vapa, të mbledhura në Kolegjin Baxter në Kidderminster në Mbretërinë e Bashkuar u testuan në një laborator. Rezultatet treguan se fëmijët që i përdorin ato mund të thithin më shumë se dyfishin e sasisë së ditore të plumbit dhe nëntë herë më shumë sasinë e nikelit.
Nivelet e larta të ekspozimit të plumbit tek fëmijët mund të ndikojnë në sistemin nervor qendror dhe zhvillimin e trurit, sipas Organizatës Botërore të Shëndetësisë, sipas BBC.
Laboratori Inter Scientific, në Liverpool, i cili punon me prodhuesit e vapave për të siguruar përmbushjen e standardeve rregullatore, analizoi 18 vapa ku shumica ishin të paligjshme dhe nuk kishin kaluar asnjë lloj testimi përpara se të shiteshin në MB.
Bashkëthemeluesi i laboratorit, David Lawson tha se “Në 15 vjet testim, nuk kam parë kurrë plumb në një pajisje. Asnjë nga këto nuk duhet të jetë në treg ato thyejnë të gjitha rregullat për nivelet e lejuara të metalit. Ata janë grupi më i keq i rezultateve që kam parë ndonjëherë.”
Në vape të dizajnuara me ngjyra për t’u dukur si stilolapsa sasitë e metaleve të gjetura ishin: plumb – 12 mikrogramë për gram, 2.4 herë më shumë se niveli i parashikuar i ekspozimit të sigurt; nikel – 9.6 herë më shumë dhe krom – 6.6 herë më shumë.
Metalet mendohej se vinin nga elementi ngrohës por testet treguan se ato ishin në vetë lëngun elektronik.
BBC News ua tregoi rezultatet nxënësve të Kolegjit, të cilëve u ishin konfiskuar vapat. Ata pranuan se ishin të lidhur me nikotinën dhe u përpoqën të hiqnin dorë nga pirja e vapeve.
Profesori i epidemiologjisë në Universitetin e Nottinghamit, John Britton, i cili ulet në Grupin e Duhanit të Kolegjit Mbretëror të Mjekëve, tha se thithja e metaleve mund të jetë e rrezikshme.
“Plumbi është një neurotoksinë dhe dëmton zhvillimin e trurit, kromi dhe nikeli janë alergjenë dhe grimcat metalike në përgjithësi në qarkullimin e gjakut mund të shkaktojnë mpiksjen e gjakut dhe mund të përkeqësojnë sëmundjet kardiovaskulare”, tha ai.
Qeveria ka ndarë 3 milionë paund për të trajtuar shitjen e vapave të paligjshme në Angli. Ajo dëshiron të financojë më shumë blerje testuese dhe t’i heqë produktet nga dyqanet dhe po kërkon prova për të ndihmuar në uljen e numrit të fëmijëve që përdorin vapa.
