I dërguari i Bashkimit Evropian për dialogun Kosovë-Serbi, Miroslav Lajçak, ka deklaruar se pavarësisht paqes në Ballkan dhe Bruksel gjatë muajve të verës, sfidat nuk kanë munguar.
Përmes një postimi në Facebook, Lajçak ka rrëfyer për takimin që zhvilloi në Bruksel me emisarin e Shteteve të Bashkuara të Amerikës për Ballkanin Perëndimor, Gabriel Escobar.
“Ndërsa ritmi në Bruksel u ngadalësua gjatë verës, sfidat në Ballkanin Perëndimor nuk u zhdukën.
Një fushë e veçantë që ka mbetur lart në agjendën time është situata në veri të Kosovës. Për t’u përgatitur për muajt e ardhshëm dhe për të forcuar më tej përpjekjet tona të përbashkëta, ftova Escobar në Bruksel për diskutime të thelluara dhe takime koordinuese.
Së bashku me ekipet tona diskutuam në detaje çështjet e dialogut, ndamë vlerësime të situatës aktuale, zhvillimet e muajve të fundit dhe pritshmëritë për periudhën e ardhshme. Gjithashtu u siguruam që të harmonizonim hapat dhe prioritetet e nevojshme të ardhshme”, ka shkruar ai.
Lajçak ka bërë të ditur se do të jetë i pranishëm ditën e nesërme dhe pasnesër në Bled dhe Beograd, ku do të takohet me kryeministrin e Kosovës, Albin Kurti dhe presidentin serb, Aleksandër Vuçiç.