1598 aplikime janë shënuar në universitetin e Gjirokastrës gjatë fazës së parë të aplikimeve të të rinjve për shkollat e larta. Zëvendës rektori Jaho Canaj shprehet se bëhet fjalë për një rritje të ndjeshme me rreth 350 aplikime më shumë se vitin e kaluar. Interesin më të lartë e kanë marrë degët e ekonomikut dhe infermierisë, por shifrat janë më të larta se një vit më parë edhe në programet e mësuesisë.
“Është e pasqyruar në të gjitha programet e studimit.Rritjen më të madhe e ka fakulteti ekonomik ndjekur nga ai i shkencave shoqërore dhe fakulteti i shkencave të natyrës,ku është më e ulët se dy të parët. Ajo që bie në sy është fakti që studentët që kanë aplikuar këtë vit akademik kanë zgjedhur degët e fakultetit ekonomik, por rritje të interesit ka pasur edhe në programet e mësuesisë ku rritja është e ndjeshme krahasuar me vitin e kaluar. Nëqoftëse do t’u referohemi shifrave të aplikimeve krahasuar me shtatorin 2022 vëmë re se në rang universiteti i kalon 20 përqind. Pra nga 1283 aplikime kanë shkuar këtë vit në 1598.”
Për Canajn kjo panoramë ndryshe lidhet me rritjen e performancës së universitetit “Eqrem Çabej” i cili për këtë vit akademik ofron edhe dy programe të reja studimi të cilat jane çelur në bashkëpunim me universitete italiane dhe në përfundim të fazës së parë kanë marrë secila nga 50 aplikime.
“Kjo rritje ka ardhur si shkak i rritjes së performancës së universitetit ku rol ka edhe ndërkombëtarizimi. Në prag të këtij viti akademik u hapën dy degë të reja siç është Menaxhimi Dixhital dhe Menaxhimi i Turizmit të Qëndrueshëm. Dy programe të hapura me universitetin e Molises dhe atë të Salentos që kanë rritur potencën e këtij institucioni akademik që ofrojnë diploma të përbashkëta me universitetet përkatëse. Po ashtu, gjatë vitit të kaluar, studentë të universitetit tonë ishin pjesë aktive e programeve Erasmus duke filluar që me Spanjën e deri në Shtetet e bashkuara të Amerikës, programe që do të vazhdojnë edhe në vijim.” Regjistrimi i studentëve ka nisur ditën e sotme dhe do të vijojë deri më datën 11 shtator.